الحب ...... فى صفيحة الزبالة

 الموضوع ده اول مرة كتبته كان فى منتدى الدى فى دى العربى بتاريخ 16-12-2007

المشهد نهار خارجى مكان يشبه القهوة البلدى مكتوب عليه 

( قهوة و كوفى شوب المعلم شحاتة ابو دقه)

على ترابيزة متطرفة يجلس اتنين ( ابطال قصتنا بيومى و شاهيناز ).....يستمتعان بالاصوات الرومانسية المغردة لبياع الترمس , و اصوات الحمير التى تجر عربيات الكارو فى الشارع  , و اصوات فرقعة الدومينو و الطاولة التى لا تختلف كثيرا عن اصوات القنابل ناهيك عن الايقاع المتناغم الصادر من السمكرى المجاور للكوفى شوب
من الاخر .... المنظر عاطشفى عاطشفى عاطشفى  ... لابعد حد

 

بيومى : وحشتينى 

شاهيناز: انت اكتر

بيومى :(يلاحظ ان ايديها مربوطة) انتى اكتر ايه ده مال ايدك ؟؟(متسلبطا عشان يمسك ايديها)

شاهيناز: (سايبة ايديها و عاملة عبده العبيط) اصلى كنت بعمل صينية بطاطس امبارح و اتحرقت

بيومى :ايدك؟

شاهيناز: الاتنين ايدى.. و البطاطس برضه. , بس الحمد لله انا ايدى كويسة انما صينية البطاطس ماتت محروقه و ماما زعقتلى و قالتلى انتى مش حتعمرى بيت و مينفعش كدة و ....

بيومى  (مقاطعا فى تسبيلة كلارك جيبل لدلال عبد العزيز فى مسرحية رد قلبى):ولا يهمك لما نتجوز مش حخليكى تعملى حاجة

شاهيناز:بجد يا بيومى

بيومى :طبعا.. و انا مستغنى عنك ؟؟ حد يقول القمر اطبخ بطاطس  ؟؟ القمر وظيفته ينور بس ...

شاهيناز:القمر مستعد يغسل.. و يطبخ.. و يكنس ..لو ده حيخليك مبسوط

بعد عامين  ....

و بعد ماكوفى شوب المعلم شحاتة اتشمعت بالشمع الاحمر  لاسباب امنية غير معروفة  .... اضطر بيومى و شاهيناز يدخلوا عش الزوجية السعيد بعد ما اتسدت كل الغرز.. قصدى كل السكك فى وشهم و ملقوش مكان يتلموا فيه

- ليل داخلى-

المشهد بيومى و شاهيناز فى ليلة فرحهم

بيومى :انا مش مصدق نفسى انتى خلاص بقينى مراتى

شاهيناز:اه يا حبيبى انا كمان مش مصدقه معقولة احنا اتفقل علينا باب واحد

بيومى : و محدش حيفتحه يا روحى بحبك

شاهيناز:بموت فيك

بعد شهر و نص من الجواز

المشهد نهار داخلى /عشة الزوجية

بيومى :بقولك ايه يا شاهى 

شاهيناز: ايه؟؟؟

بيومى :انتى مش ملاحظة اننا من يوم ماتجوزنا ماكلناش سمك مشوى

شاهيناز:اه صحيح.... خلاص يا حبيبى النهاردة ان شاء الله حترجع من شغلك تلاقى سمك مشوى على الغدا

نفس النهار الداخلى و نفس المشهدبس بعدها ب 8 ساعات على الغدا

بيومى :(ينظر الى الاكل فى ذهول كأنه لقى فيل فى البلكونة)ايه ده ؟؟؟؟؟؟؟؟؟؟؟؟؟؟؟؟؟؟؟؟؟!!!!!

شاهيناز ( فى استغراب واضح ):هو ايه اللى ايه ده ؟ مش فاهمة ؟!!!!

بيومى :الرز 

شاهيناز:ماله؟؟ نى ؟؟

بيومى :لا

شاهيناز: ناقص ملح؟؟

بيومى :لا

شاهيناز:حادق؟؟

بيومى :لا

شاهيناز: فيه حاجات بتمشى ؟؟

بيومى :لا

شاهيناز:امال ايه؟؟؟

بيومى :ابيض؟؟؟

شاهيناز:نعم ؟؟؟؟؟( فى سرها : نعم يا روح أ.... ) امال انت عاوزه ايه؟؟كاروهات؟؟؟

بيومى :انتى بتهرجى؟؟ هو السمك بتاكل برز ابيض؟؟

شاهيناز:امال برز ايه؟؟

بيومى :مسمعتيش عن رز الصيادية؟؟؟

شاهيناز:لا سمعت بس ده مع السمك المقلى

بيومى :والله ده من امتى

شاهيناز:والله انا متربية على كدة طول عمرنا بناكل السمك المشوى برز ابيض و المقلى بصيادية

و تبدا الصدمة الثقافيةالحضارية المتحجرة داخل قوقعة اللاوجود المحورى لطرق طبخ الطعام المختلفة للاتنين تظهر

بعد 3 سنين

المشهد ليل داخلى /حجرة المعيشة امام التليفزيون

بيومى :هاتلينا قناة الرياضة  عشان الماتش 


شاهيناز:انا عاوزة اتفرج على المسلسل

بيومى :مانتى طول النهارقاعدة ماتتفرجى فى الاعادة

شاهيناز:اسم الله؟؟؟و انا قاعدة فاضية؟؟؟ مش ورايا هم البيت دانا لسة.. مخلصة غسيل المواعين من 10 دقايق و بعدين مانت بتتغلب كل مرة و تنكد على امى

بيومى : مانتى اللى  وشك وحش  عمرى  و بتفقرى فيها من اول الماتش

شاهيناز:خلاص انزل اتفرج عالماتش عالقهوة عشان تبعد عن وشى الوحش

بعد 10 سنين

ماشاء الله  دلوقتى بقى عندهم مرسى و نانسى
التغيرات الناتجة بسبب عوامل التعرية و التغطية و البلا الازرق
بيومى ظاهرة التصحر بدات تجتاح شعره مع تغير ملحوظ فى بنيه الجسم التى اصبحت اشبه بالتلاجة مع ظهور انبعاج واضح  عند منطقة البطن  فلو العلماء حاولوا يحطوا تصور لتلاجة قرعة و حامل مش حيلاقوا احسن من كدة 

بالنسبة لشاهيناز الحمد لله شعرها موقعش لانه مش عارف يقع اصلا  نظرا لأنه  بقى كتله واحدة متشابكة  ضد الوقوع و الكسر و المية و التسريح .... ده  حتى لما بتستحمى بيفضل ناشف و هذه معجزة فى حد ذاتها اما بالنسبة للجسم فحدث ولا حرج ..... انبوبة بوتجاز ماشية تتمختر بشعرها الغجرى المجنون ابن المجنونه

المشهد ساعة عصرية ولا مغربية كله شبه بعضه مبقتش تفرق 

 شاهيناز قاعدة تذاكر للعيال و حاطة مجموعة من الاسلحة المتنوعة لزوم المذاكرة ( فردة شبشب -مسطرة-عصايا-خرطوم) طبعا نوع السلاح المستخدم تحدده طبيعة الغلطة

شاهيناز:بت.. عارفة لو كلمة.. نزلت من على السطر و دينى شوفى و دينى ؟؟ لاعيدك الواجب كله و حتنضربى
 و انت يا زفت يا مرسى...

(بالمناسبة مرسى مستخبى فى الحمام لأن الشهادة فيها كحكة)

 ماشى و انت حتقعد طول عمرك فى الحمام اول ماتطلع حتضرب انا قاعدالك النهاردة و اما اشوف بقى

بعد ساعة و كله خلص الواجب و الواد مرسى اضرب العلقة بتاعه الشهادة بيومى افندى راجع من الاوفر تايم بالجرنال و البطيخة

بيومى : يا مدااام الاكل جاهز؟؟

شاهيناز:ربع ساعه حسخن الاكل

بيومى:يعنى انتى مش عارفه معاد رجوعى و انا كنت متجوز عشان افضل جعان برضه؟امال انا اتجوزتك ليه؟

شاهيناز:ليه و انت اتجوزتنى عشان اخدمك و لا ايه؟

بيومى:طبعا.. احمدى ربنا اصلا انى اتجوزتك
انت مبتبصيش لنفسك فى المرايه ولا ايه ؟؟ مش بتشوفى الستات شكلها ايه

شاهيناز:ده على اساس انك كريم عبد العزيز و بعدين و انا فاضية؟؟منا ورايا 60 حاجة.. اه  .. على فكرة ! ابنك جاب كحكة  !

بيومى:ماهو ربايتك  يا هانم ..حتى العيال حتخيبى املهم ده كان يوم اسود يوم ماتجوزتك

شاهيناز:ليه ؟؟؟ الله يرحم ايام الحب دانت ... كنت بتيجى فى نص الليل و انت هلكان و تفعد عالقهوة اللى قصاد بيتنا عشان بس تشوفنى من البلكونه 5 دقايق 

بيومى:كنت اعمى و حمار  , مكنتش فاكر كده كانت السكينه سارقانى

شاهيناز:انت برضه بعد كل الى باعمله لا حمد و لا شكرانيه.... دانت عيشتك تقرف و صابرة و ساكته فالح تبص عالستات التانية عاملة ايه  ؟؟ ...طب ياخويا هاتلى زى ما اجواز الستات التانية دول بيجبولهم و انا ابقى احلى منهم و ادى العيال دروس بدل منا قاعدة ليل و نهار اذاكرلهم عشان اوفر عليك مصاريف الدروس و يا ريته عاجب

(باقة متنوعة من الشتايم المركبه من نوعية ( يا ولود كذا ويا ولود كذا )و كلمة منه على كلمة منها قلم منه على قلمين منها طبعا الباقى معروف....)

و دى نهاية قصة حب بيومى و شاهيناز
السؤال ليه الحب اترمى فى صفيحة الزبالة
العيال؟؟
الفقر؟؟
الملل؟؟
عدم تقدير كل واحد لحجم مسئوليات التانى؟؟